Anëtari i Kryesisë së Partisë Demokratike, Grigels Muçollari, ka bërë një deklaratë publike sot, duke akuzuar qeverinë për mungesë transparence dhe klientelizëm në planifikimin e ndërtimit të kullave në pronat shtetërore. Sipas Muçollarit, qeveria ka në plan të shndërrojë godinën e ish-ATSH-së në një kullë dhjetëra katëshe, pjesë e një projekti më të madh të Edi Ramës për ndërtimin e qiellgërvishësve në Tiranë.
Muçollari theksoi se vendimi 328, i datës 29 maj, autorizon Agjencinë Kombëtare të Planifikimit të Territorit që të nisë një konkurs për marrjen e ideve se si do të zhvillohen këto prona. Megjithatë, ai shprehu shqetësimin se deri tani nuk ka pasur transparencë për publikun mbi cilat troje do të ndahen me privatët dhe klientët e preferuar të qeverisë në zonat më të mira dhe më të shtrenjta të Tiranës.
“Këto pasuri shtetërore dhe publike trajtohen sikur të ishin pronat e Edi Ramës. Edi Rama nuk është pronar i ATSH-së, as i tokës së Aviacionit Civil, apo Institutit të Ndërtimit, apo të Kadastrës në hyrje të Parkut të Liqenit. Këto janë prona dhe pasuri të shqiptarëve, të të gjithë atyre që kanë paguar taksa e detyrime dhe që vazhdojnë të kontribuojnë me punën dhe mundin e tyre për këtë vend,” deklaroi Muçollari.
Partia Demokratike ka bërë thirrje për transparencë të plotë për këtë projekt, duke e cilësuar atë si një tjetër akt abuzimi dhe klientelizmi, me fitues të paracaktuar në paradhomën kryeministrore. Muçollari ftoi qytetarët të reagojnë dhe të kërkojnë të drejtën e tyre, duke theksuar se këto prona dhe pasuri janë të shqiptarëve dhe jo të Edi Ramës.
“Qytetarët duhet të pyeten, pasi këto janë prona e pasuri të shqiptarëve, jo të Edi Ramës,” përfundoi ai. Kjo deklaratë vjen në një kohë kur shqetësimet për transparencën dhe integritetin e procesit të planifikimit urban në Tiranë janë në rritje.
