Kryeministri Edi Rama i ka dërguar një letër urimi kryeministrit të sapoemëruar të Kosovës, Albin Kurtit. Rama i uron sukses në drejtimin e vendit kreut të qeverisë së Kosovës. Më tej Rama shpreh vendosmërinë për të intesifikuar marrëdhëniet mes dy vendeve dhe beson se mund të ndërmerren projekte të rëndësishme. Po ashtu nuk ka munguar ftesa e kryeministrit për Albin Kurtin që të vizitojë Shqipërinë në një kohë të përshtatshme. Bie në sy se gjatë gjithë letrës ram ai drejtohet Kurtit me “Shkëlqesia Juaj”
Letra e Ramës për Kurtin:
Shkëlqesia Juaj, I dashur Albin,
Zgjedhja Juaj në detyrën e Kryeministrit të Republikës së Kosovës më jep kënaqësinë t’Ju përcjell urimet e mia për sukses në drejtimin e vendit dhe përballimin e sfidave të qeverisjes.
Duke riafirmuar vendosmërinë time dhe të Qeverisë që unë kryesoj për t’i zgjeruar e intensifikuar më tej marrëdhëniet tona, unë besoj fort se tashmë ekzistojnë të gjitha mundësitë dhe potencialet për ndërmarrje të rëndësishme e projekte të guximshme në shumë sektorë, përfshirë përballjen e përbashkët me COVID-19. Këto ndërmarrje do t’i kontribuojnë përmirësimit të jetesës dhe përparimit e integrimit më të shpejtë të shqiptarëve.
Unë mbetem gjithashtu besimplotë se Ju dhe ekipi Juaj qeverisës do t’i kapërceni me sukses sfidat me të cilat përballet Republika e Kosovës në përparimin e saj të gjithanshëm demokratik e integrues në rajon dhe më gjerë, drejt rrugëtimit të saj euroatlantik.
Me urimet më të mira për sukses të Kabinetit Tuaj qeveritar dhe me ftesën e përzemërt për të vizituar Shqipërinë në një kohë të përshtatshme për Ju, lutem pranoni, Shkëlqesia Juaj, shprehjen e konsideratës sime më të lartë.
Sinqerisht Edi Rama.
