Deputeti Kreshnik Çollaku, nga grupimi i Lulzim Bashës, është bërë deputeti i dytë që ka pranuar publikisht të qëndrojë në Partinë Demokratike (PD) pas marrjes së vulës nga Sali Berisha me vendimin e Gjykatës së Apelit. Çollaku ka bërë këtë deklaratë përmes një postimi të gjatë në rrjetet sociale, ku ka analizuar konfliktin brenda PD dhe rëndësinë e bashkimit të demokratëve.
Në postimin e tij, Çollaku shprehet se që në fillim të konfliktit brenda PD, ai ka kërkuar bashkimin e demokratëve dhe shmangien e ndarjes së partisë. Ai thekson se, pavarësisht mbështetjes së tij ndaj një pale apo tjetrës, ai gjithmonë ka kërkuar unitet. Çollaku vëren se për shkak të qëndrimeve të tij, në kohë të ndryshme është cilësuar herë si hero, herë si tradhtar.
Ai shkruan: “Për ata që dje isha ‘tradhtari’ sot jam ‘heroi’, dhe për ata që dje isha ‘hero’ sot jam ‘tradhtari’. Në fakt, unë nuk jam tradhtari por nuk jam as heroi, jam një 19-vjeçar i 1990 që nuk dua të shoh të gjunjëzuar në 2024 PD-në që në atë kohë themeluam me aq shpresë.”
Çollaku thekson se ka një realitet të ri dhe të ndryshëm në PD pas vendimit të Gjykatës së Apelit dhe se ai po i qëndron premtimit të dhënë për të respektuar këtë vendim. Ai vë në dukje se për PD për të qenë fituese, duhet të jetë e bashkuar, por gjithashtu shton se bashkimi nuk mund të jetë nënshtrim.
Deputeti ngre pyetje të rëndësishme për të ardhmen e PD: “A mundet PD të mbajë brenda vetes mendimin apo qëndrimin ndryshe? A mundet PD të mbajë brenda të njëjtës sigël apo flamur individë apo grupe që mendojnë ndryshe, që bëjnë disidencë individuale apo të organizuar ndaj lidershipit zyrtar?”
Çollaku gjithashtu njofton se ka një ide dhe propozim të cilin së shpejti do ta bëjë publik, dhe inkurajon kolegët e tij të bëjnë të njëjtën gjë dhe të hapin një dialog ose debat për çështjet që ai i konsideron jetike për të ardhmen e PD dhe opozitës në Shqipëri.
