Gjatë zhvillimit të Samitit të Investimeve në Ballkanin Perendimorë të organizuar nga BERZH ndodhi një përplasje mes Kryeministrit të Kosovës, Albin Kurti dhe kryeministres së Serbisë, Ana Brnabiç.
Mediat raportojnë se përplasja lindi kur Bërnabiç tha se Kosovën e shohin “si pjesë të Serbisë”. Kurti iu përgjigj menjëherë duke i thënë se vendi i tij quhet Republika e Kosovës dhe se njihet anë e mbarë botës si shtet i pavarur.
Teksa po fliste për investimet e huaja në Serbi, Brnabiç tha se statistikat nuk e përfshinin Kosovën.
“Serbia po ndryshon. Dhe kur them Serbia qendrore, është e dyta herë që po e them këtë, mendoj Serbia që nuk përfshin në statistika krahinën autonome të Kosovës e Metohisë, që ne natyrisht e shohim si pjesë të Serbisë. Kjo është politikë, ne tash po flasim për ekonomi dhe është me rëndësi për mua të flas vetëm për ekonominë”, tha ajo.
Pas saj foli Kurti, i cili u pyet paraprakisht nga dikush si arrin Kosova të tregtojë me vendet mosnjohëse.
Kryeministri tha se po të fliste si Brnabiç, do ta përmendte Vojvodinën, Sanxhakun, Luginën e Preshevës.
“Vendi im quhet Republika e Kosovës, jo siç iu referua këtu, ‘Kosova e Metohija’. Po të shkoja kësaj rruge do të merrja shumë kohë, sepse përveçse Serbia, do të duhej të thosha Serbia e Vojvodina, Sanxhaku, Toplica, Rashka, Lugina e Preshevës… Më mirë të përqendrohemi në ekonomi”, tha Kurti.
