Ambasadorja amerikane Yuri Kim i është përgjigjur nga Uashingtoni deklaratave që ish-kryeministri Sali Berisha bëri sot në Fier. Në një postim në Twitter, Kim shkruan se SHBA-të janë serioze sa i përket korrupsionit, pavarësisht nëse janë të përfshirë liderët apo politikanët e lartë të vendeve të caktuara.
Ambasadorja shprehet se SHBA-të mbështesin një Shqipëri më demokratike, më të fortë dhe të begatë. Ajo shtoi se Amerika ka qenë në Shqipëri për 30 vitet e fundit dhe do të vazhdojë të jetë edhe në 30 vitet në vazhdim.
“Në Uashington për të koordinuar hapat e ardhshëm në marrëdhëniet SHBA-Shqipëri. Ne jemi seriozë sa i përket korrupsionit duke përfshirë rastet kur liderët ose politikanë të lartë të vendeve të caktuara përfshihen në çështje korrupsioni masiv. Ndërsa, mbështesim një Shqipëri më demokratike, më të fortë dhe më të begatë. SHBA ka qenë në Shqipëri për 30 vitet e fundit dhe do të vazhdojmë të jemi me ju për 30 vitet e ardhshme e më tej”, shkruan Kim.
Ish-kryeministri Sali Berisha vazhdoi turin e tij të takimeve me demokratët, teksa ndalesa e radhës ishte Fieri. Nga aty Berisha foli edhe për shpalljen e tij “non-grata”, ndërsa i quajti shpifje materialet në të cilat u bazua vendimi i DASH.
