Gjyqtarja e Apelit të Shkodrës, Marina Rraboshta ka paraqitur ditën e sotme dorëheqjen.
Mirëpo dorëheqja e saj nuk është pranuar nga Këshilli i Lartë i Gjyqësorit.
Gjyqtarja nuk kishte kaluar ende në sitën e Vettingut.
Për Rraboshtën KPK kishte filluar procedurën e rivlerësimit, që në 15 mars të 2019-ës.
Gjyqtarja ushtron prej vitesh detyrën në Gjykatën e Apelit të Shkodrës.
Ajo është dekoruar nga ish-presidenti, Bujar Nishani me motivacionin “Në vlerësim të veprimtarisë së spikatur të diktaturës dhe shtypjes, si dhe sakrificave të pamohueshme në shërbim të përhapjes së vlerave të lirisë dhe demokracisë.
Rraboshta është akuzuar disa herë për veprime korruptive.
Në 2016-ën, gjashtë familje shkodrane e denoncuan publikisht gjyqtaren.
Ata pretendonin, se nëpërmjet veprimeve të paligjshme të Rraboshtës, u ishte grabitur prona padrejtësisht.
Asokohe, Prokuroria e Shkodrës pushoi padinë ndaj gjyqtare, ndërsa njëra nga banoret i kërkoi hetim ministrit të Drejtësisë, për vendimet e gjyqtares.
Gjithashtu, Rraboshta ka ulur dënimin për vrasje për Sokol Mjacajn.
Ky i fundit, në bashkëpunim me dy persona të tjerë, vranë në 2010-ën një 13-vjeçar, pasi i grabitën varësen.
Gjykata e Shkodrës e dënoi Mjacajn me 10 vite burg, por Apeli e uli në katër, ndërsa për njërin prej bashkëpunëtorëve, trupi gjykues i drejtuar nga Rraboshta uli dënimin nga burgim të përjetshëm në 25 vite.
Ngjarja asokohe shkaktoi përleshje në sallën e gjyqit, ndërmjet palës së akuzuar dhe familjarëve të viktimës.
Ndërkohë vetëm 1 muaj pasi kishte dalë nga burgu i Lezhës, Mjacaj kryen krimin e radhës, duke vrarë dy turistë çekë në Dukagjin.
