Radarët për monitorimin e trafikut po shkaktojnë një valë gjobash masive, të cilat ngjallin shumë dyshime për ligjshmërinë e tyre.
Edhe pse sistemi i monitorimit të trafikut në rrugët kryesore kombëtare nuk është përfunduar dhe nuk ka kaluar zyrtarisht në duart e Autoritetit Rrugor Shqiptar, këto radarë kanë filluar të vendosin gjoba në masë, shpesh pa dijeninë e drejtuesve të mjeteve.
Marin Bezhani, Drejtor i Qendrës Kombëtare të Monitorimit të Trafikut, sqaron se procesi funksionon në këtë mënyrë: “Kur ndodh një shkelje, kamerat inteligjente regjistrojnë automatikisht fotot dhe të dhënat përkatëse. Më pas, operatorët analizojnë këto informacione dhe i dërgojnë Policisë së Shtetit, e cila bën verifikimin dhe më pas lëshon gjobën në sistemin elektronik, drejtuar drejtpërdrejt drejtuesit të mjetit.”
Sipas Bezhanit, monitorimi është në fazë prove në disa pika kyçe, si Golemi pranë stacionit të trenit, mbikalimet e Spillesë 1 dhe 2, zona e njohur si ‘Zham Sektor’, si dhe në Bishtin e Zhurit dhe Rrogozhinë. Testime po bëhen edhe në disa pjesë të tjera të rrugëve kombëtare.
Projekti i monitorimit të trafikut, me një vlerë rreth 20 milionë euro, synon vendosjen e kamerave përgjatë 200 kilometrave autostradë.
Qëllimi është që këto kamera të regjistrojnë dhe transmetojnë në kohë reale çdo shkelje që bëhet në rrugë.
