Policia ka vazhduar me kontrollet në rrugët e vendit për të vënë në pranga shkelësit e Kodit Rrugor. Policia e Tepelenës ka vënë në pranga një 34-vjeçar i cili ka publikuar një video ku bënte lëvizje të rrezikshme në rrugë. Sipas burimeve zyrtare shtetasi me inicialet A.K., 34-vjeç i është vendosur një gjobë prej 60.000 lekë të rinj dhe i është bllokuar mjeti.
Kujtojmë se video u publikua nga faqja ‘Aksidente rrugore’, ai shihej teksa del nga makina tip Golf 5 me targa AA 842 JJ dhe hipën mbi makinë. Shfaqja nuk përfundon me kaq, pasi makina vazhdon të eci pa shofer, pasi i riu që e drejton kërcen me duar e këmbë mbi makinë.
Njoftimi i plotë:
Publikoi video duke kryer veprime të rrezikshme për sigurinë e jetës në rrugë, gjatë drejtimit të mjetit, shoqërohet në Polici, 34-vjeçari nga Tepelena. Ndëshkohet me 60.000 lekë të rinj gjobë dhe me bllokim mjeti.
Shërbimet e Policisë Rrugore, duke marrë shkas nga publikimi i një videoje në rrjetet sociale, ku shfaqej një drejtues automjeti që kryente manovra të rrezikshme në rrugë, kanë identifikuar dhe shoqëruar në ambientet e Policisë, shtetasin A. K., banues në Tepelenë. Ky shtetas, më datë 17.07.2021, rreth orës 13:00, në rrugën e brendshme të fshatit Dragot, Tepelenë, ka kryer manovra të rrezikshme në rrugë duke drejtuar mjetin tip “Volksëagen”. Për këtë shtetas është vendosur masa administrative 60.000 lekë të rinj, me sanksion plotësues ndalim administrativ i mjetit dhe tërheqje e lejes së qarkullimit për manovra të rrezikshme në rrugë, mosndryshim të pronësisë së mjetit brenda afatit dhe mosshlyerje të masave administrative brenda afatit ligjor.
Policia Rrugore apelon për respektim të rregullave të qarkullimit rrugor, për përgjegjshmëri e përgjegjësi për sigurinë e jetës gjatë drejtimit të automjetit, pasi cilido që do shkelë rregullat e qarkullimit apo do kryejë manovra të rrezikshme në rrugë, që cenojnë rëndë sigurinë rrugore do përballet me Policinë Rrugore, në zbatim të plotë të Kodit Rrugor.
Policia Rrugore falënderon qytetarët dhe median, për denoncimet e adresuara për shkelje të rregullave të qarkullimit rrugor dhe fton cilindo që do rregullin e ligjin të denoncojë pa hezitim çdo paligjshmëri, duke i garantuar anonim të plotë, reagim të menjëhershëm e të paanshëm.
