Kandidati për kryetar i Partisë Demokratike në zgjedhjet e 13 qershorit, Fatbardh Kadilli, përmes një videomesazhi të publikuar në rrjetin social në “Facebook”, thekson se kreu i opozitës duhet të ketë vetën një mandat 4-vjeçar. Gjithashtu, Kadilli shprehet se nëse nuk fiton zgjedhjet, duhet të largohet përfundimisht.
Mes të tjerash, kandidati për kreun e PD-së thekson se misioni i tij kryesor, është që t’i japë fund manifestit politik, si dhe t’i japë fund kryetarit-pronar të Partisë. Kadilli thekson se kryetari i opozitës ose fiton dhe bëhet Kryeministër, ose shkarkohet dhe shkon në shtëpi. Kryetari që humb zgjedhjet, nuk mund të rikandidojë më sipas Kadillit.
“PD-ja ime dhe juaja është streha e gjithkujt, por nuk mund te jete kurrë peng i askujt! Manifesti im politik i jep fund kryetarit-pronar. Propozimi im është që Kryetari të zgjidhet vetëm për një mandat 4-vjeçar dhe vetëm me një mision: Të fitojë zgjedhjet politike, me PD forcë e parë.
Kryetari ose fiton dhe bëhet Kryeministër, ose shkarkohet dhe shkon në shtëpi. Kryetari që humb zgjedhjet nuk mund të rikandidojë më. Ky është manifesti im politik. Unë jam Bardh Kadilli. Në garë për një PD të hapur, të pastër, të bashkuar, fituese”, u shpreh Kadilli nëpërmjet video-mesazhit.
