Këtë të martë, në Gjykatën e Posaçme Kundër Korrupsionit dhe Krimit të Organizuar (GJKKO), u zhvillua një tjetër seancë e tensionuar në kuadër të megaprocesit “Plumbi i Artë”.
Në sallën e gjyqit ishte i pranishëm bashkëpunëtori i drejtësisë, Nuredin Dumani, i cili dha dëshminë e tij mbi një sërë veprimtarish kriminale, përfshirë grabitjet e kambistëve në Elbasan, Kavajë dhe Durrës.
Seanca u shoqërua me kundërshti të ashpra nga të akuzuarit, të cilët e ndërprenë disa herë dëshminë e Dumanit, duke shkaktuar tensione në sallë. Në kulmin e përplasjeve, i akuzuari Petrit Qoli deklaroi: “Nuredin Dumani është krijesa më e shpifur njerëzore që kam njohur në 53 vitet e jetës sime.”
Për të qetësuar situatën, gjykata u detyrua të ndërpresë seancën për disa minuta. Pas rifillimit, procesi vijoi nën masa të rrepta sigurie, ndërsa tensionet mbetën të larta.
Në vijim të dëshmisë së tij, Dumani përshkroi në detaje mënyrën e organizimit dhe kryerjes së grabitjeve.
Ai tregoi se në grabitjen në Kavajë, Talo Çela, një nga të akuzuarit kryesorë, goditi me levë në kokë një kambist, duke i shkaktuar dëmtime të rënda dhe më pas morën një shumë prej rreth 20 milionë lekësh.
Dëshmitë e Dumanit pritet të luajnë një rol kyç në procesin gjyqësor, ndërkohë që përplasjet mes palëve vazhdojnë të dominojnë zhvillimet në sallën e gjyqit.
