Konflikti mes Izraelit dhe Iranit u përshkallëzua ndjeshëm në orët e para të mëngjesit të së shtunës, pasi të dy shtetet shkëmbyen sulme ajrore të intensitetit të lartë.
Goditjet erdhën menjëherë pasi Irani deklaroi se nuk do të negociojë për programin e tij bërthamor për sa kohë që Izraeli vijon ofensivën ushtarake.
Sipas burimeve izraelite, Forcat Ajrore të Izraelit goditën dhjetëra objektiva ushtarake në Iran, përfshirë qendra për prodhimin e raketave, struktura kërkimore të lidhura me armët bërthamore dhe depo ushtarake në Isfahan, Qom dhe provinca të tjera strategjike.
Një nga objektivat kryesorë ishte Kompleksi Bërthamor në Isfahan, i cili pësoi dëme serioze. Kjo u konfirmua edhe nga zyrtarë iranianë, të cilët theksuan se nuk kishte rrjedhje të materialeve të rrezikshme.
Në Qom, një sulm goditi një ndërtesë banimi, ku raportohet se humbi jetën një 16-vjeçar dhe u plagosën dy persona të tjerë. Ndërkohë, në Teheran dhe qytete të tjera, mbrojtja ajrore u aktivizua, duke parandaluar disa prej raketave, por jo të gjitha.
Zëdhënësit e ushtrisë izraelite konfirmuan gjithashtu eliminimin e Amin Pour Judaki, komandant i njësisë së dytë të dronëve të Gardës Revolucionare Islamike, i cili akuzohej për drejtimin e qindra sulmeve me mjete ajrore pa pilot nga zona e Ahvazit në Iranin jugperëndimor.
Nga ana tjetër, Irani lëshoi raketa drejt qendrës së Izraelit, përfshirë Tel Avivin dhe Haifën.
Ndërkohë, tensioni diplomatik mbetet i lartë. Në Gjenevë, ministri i Jashtëm iranian Abbas Araghchi refuzoi çdo ofertë për negociata të reja pa ndalur fillimisht agresionin izraelit.
Ai deklaroi se programi bërthamor i Iranit është paqësor dhe mbrojtja e tij është një e drejtë legjitime. Araghchi pritet të marrë pjesë në një raund të ri bisedimesh këtë fundjavë në Stamboll me përfaqësues të Lidhjes Arabe.
Nga ana tjetër, presidenti amerikan Donald Trump vendosi një afat 14-ditor për Iranin që të shmangë një sulm të mundshëm nga SHBA, duke sinjalizuar se diplomacia është ende në tavolinë, por me kohë të kufizuar.
Zyrtarë perëndimorë kanë shprehur shqetësim për përshkallëzimin e mëtejshëm dhe pasojat rajonale, ndërsa Ambasadori i Izraelit në OKB e cilësoi Iranin si një kërcënim ekzistencial dhe me “axhendë gjenocidale”.
Ndërkohë, Irani njoftoi arrestimin e 22 personave në Qom, të dyshuar për lidhje me shërbimet sekrete izraelite dhe për përhapje paniku në publik.
Operacioni i Izraelit, i nisur më 13 qershor, ka rezultuar deri tani në vrasjen e dhjetëra komandantëve dhe shkencëtarëve bërthamorë iranianë, si dhe në shkatërrimin e dhjetëra objektivave ushtarake, ndërkohë që përplasja mes dy fuqive nuk tregon shenja ndalimi.
