Inspektorati Kombëtar i Mbrojtjes së Territorit nisi të shtunën një tjetër aksion për shembjen e objekteve buzë detit në zonën e Radhimës dhe Orikumit.
Të ashtuquajturat “njësi shërbimi sezonale”, si bare dhe beach bare, ndonëse me leje të dhëna pak muaj më parë, rezultuan të ndodheshin në zonën e projektit të zgjerimit “Lungomare 3” dhe u shembën për të hapur rrugën për infrastrukturën e re turistike. Shembjet e sotme pasojnë ndërhyrjet e ngjashme në Dhërmi dhe Jalë.
Por ndërkohë që IKMT vepron në terren, një tjetër projekt satelitësh për monitorimin e territorit, “Albania 1” dhe “Albania 2”, i cili u promovua me bujë, ka mbetur i heshtur dhe pa ndonjë rezultat të dukshëm. Asnjë ndërtesë pa leje nuk është shembur falë këtyre “syve superteknologjikë” që Rama i përshkroi si “kryeinspektorin e padukshëm, pa kushërinj dhe pa parti”.
Por ndërkohë që në terren vijojnë shembjet, lind pyetja: ku janë rezultatet e satelitëve “Albania 1” dhe “Albania 2”? Me një kontratë që kap vlerën e 6 milionë dollarëve për 3 vite, qeveria shqiptare premtoi në tetor 2023 se satelitët do të ishin “sytë në qiell” për të monitoruar çdo paligjshmëri, nga ndërtimet pa leje, kultivimi i kanabisit, përmbytjet dhe zjarret, e deri te mbrojtja e zonave të mbrojtura.
IKMT pranoi se nuk ka ndërmarrë asnjë veprim për shembje objektesh bazuar në të dhëna satelitore. Punonjësit e institucionit janë ende në fazë trajnimi dhe nuk janë të aftë të lexojnë imazhet e ofruara.
E njëjta situatë raportohet edhe nga Policia e Shtetit dhe institucionet e tjera që supozohej të përfitonin nga teknologjia e re. Parcelat e drogës janë zbuluar me helikopter apo operacione tokësore, ndërsa Ministria e Bujqësisë e vetmja gjë që ka bërë është numërimi i serave.
Në 18 muaj shërbim, emergjencat civile i kanë përdorur pamjet vetëm në 4 raste: 3 zjarre dhe 1 përmbytje. Kjo tregon një diferencë të madhe midis premtimeve fillestare dhe përdorimit real të satelitëve në praktikë.
Ekspertët ndërkohë theksojnë se monitorimi satelitor i Shqipërisë nuk është 24 orë në ditë dhe që çdo imazh kërkon interpretime të specializuara.
Shqipëria ka shpenzuar 6 milionë dollarë për një shërbim satelitor që deri tani ka numëruar sera, ka asistuar në katër raste emergjente dhe nuk ka ndihmuar në asnjë prishje apo ndalim ndërtimi pa leje, përkundër të gjitha premtimeve qeveritare.
