Këtë të mërkurë është liruar nga qelia një programues 32-vjeçar me origjinë kineze, i cili akuzohej për një sekmë mashtrimi miliona dollarëshe dhe ishte i shpallur në kërkim ndërkombëtar. Si organ akuze në cështjen e tij e cila ishte apeluar nga i pandehuri, ishte ish-Prokurorja e Përgjithshme, Arta Marku. Bëhet fjalë për shtetasin Liangbin Chen, i cili u arrestua në aeroportin e Rinasit rreth orës 14:00 të datës 11 korrik 2022 gjatë kontrollit të pasagjerëve të një fluturimi Londër-Tiranë.
Shtetasi kinez u arrestua me qëllim ekstradimi pasi ndaj tij nga autoritetet në Kinë ishte i dënuar me arrest me burg dhe ndaj tij ishte lëshuar urdhër arrest ndërkombëtar. Chen njihet si kreu i një grupi kriminal që ka realizuar grabitjen me mashtrim me vlerë 140 milionë euro.
Ndaj tij fillimisht Gjykata e Tiranës la në fuqi masën e sigurisë “arrest me burg”, por Chen kërkoi zbutjen e saj dhe largimin nga qelia, për shkak se pretendonte që kishte sëmundje në kokë.
Çështja shkoi në Apel dhe gjykata vendosi masën “Arrest shtëpie” për shtetasin kinez, me arsyetimin se i rrezikohej jeta në qelinë e burgut.
Burime për Balkanweb bëjnë me dije se Prokurorja Arta Marku ka vendosur të refuzojë ankimin e Prokurorisë së Tiranës që kërkonin vazhdimin e masës së sigurisë “arrest me burg” për Chen.
Gjithashtu mësohet se që në fillim të seancës Marku deklaroi se heq dorë nga ankimi dhe se personi nën hetim nuk duhet të qëndrojë në kushtet e paraburgimit, për shkak të kushteve shëndetësore.
Seanca gjyqësore në Apel vijoi kështu me shqyrtimin e kërkesës për zbutje mase, të dorëzuar nga i akuzuari që zotëron miliona, ndërsa në përfundim u njoftua edhe zyrtarisht që u la në fuqi masa e “arrestit në shtëpi” të vendosur nga shkalla e parë, për shkak se prokurori i çështjes (Arta Marku në këtë rast), hoqi dorë nga ankimi.
