Rreth dhjetë ditë më parë, një ngjarje tragjike u regjistrua në lumin Araktos, në qytetin e Artës, Greqi, ku dy fëmijë, të moshës 12 dhe 14 vjeç, humbën jetën teksa laheshin në ujërat e rrëmbyeshëm të lumit.
Përkundër përpjekjes së emigrantit shqiptar, Ledian Goga, i cili u hodh në lum për të shpëtuar fëmijët dhe arriti të nxirrte trupat nga uji, jeta e tyre nuk mundi të shpëtohej.
Njëri nga viktimat ishte Kleonis Fetollari. Familja e tij, e shkatërruar nga dhimbja, rrëfen momentet kur mësoi lajmin e rëndë.
“Në Greqi mora bashkëshorten e ika të punoja. Karta nuk kisha. Kisha karta provizore. Një ditë shkova te shihja një punë, kur u ktheva kisha lënë djalin në shtëpi e nuk e gjeta. Kishte marrë dy euro e kishte dalë të blinte diçka. Me marrin telefon me thonë ku e ke djalin, hajde se po te mbytet djali. Kur vajta nuk më lanë ta shihja. Djali ishte në koma 3 ditë, doktorët nuk dhanë shpresë. Bënë të pamundururën,” tregon Bledar Fetollari, babai i Kleonisit.
Trupi i të birit u vendos të varrosej në atdhe, ndërsa familja mori një vendim fisnik për të dhuruar organet e fëmijës. Shpresa e vetme e babait ishte që zemra e djalit të rrihte sërish, në trupin e një fëmije tjetër.
“I dhurova për arsye se djali nuk do jetonte më. Ngrita kokën lart e i thashë Zotit: Të jetojë zemra e djalit në një fëmijë tjetër. Ta ndiej që zemra është gjallë. Kjo gjë do bëhet i thashë, si fëmijë grek shqiptar italian. Mu prenë shpresat që nuk do ishte më”, tha ai.
Përtej humbjes, familja Fetollari përballet me vështirësi të mëdha ekonomike. Jetojnë në kushte të mjerueshme dhe tashmë, pas kësaj fatkeqësie, kërkojnë një dorë ndihme.
“Borxhe po, jam e pa shtëpi pa katandi. E kur e solla djalin këtu e sollën te shtëpia e vjehrrës, për ato halle vajta. Kërkoj ndihmë se skam ç’të bëj më, shpirti mu plagos, por më duhet një ndihmë. Nuk kam më fuqi”, shton babai i viktimës.
Në shenjë mirënjohjeje për aktin human të dhurimit të organeve, autoritetet greke kanë vendosur t’u japin prindërve të Kleonis Fetollarit pasaportat greke, një gjest simbolik shprese mes dhimbjes që ka goditur familjen.
