Holanda njoftoi sot se do të legalizojë eutanazinë për fëmijët e moshës një deri në 12 vjeç të cilët vuajnë nga sëmundje të pashërueshme.
Ministri i Shëndetësisë Hugo de Jonge bëri me dije se do të rishikojë legjislacionin aktual. Vendimi i tij bazohet në konstatimet e një studimi nga ekspertë , sipas të cilit fëmijët me sëmundje të pashërueshme vuajnë tmerrësisht.
Eutanazia është e ligjshme në Holandë për të miturit mbi moshën 12 vjeç që mund të japin konfirmimin e tyre dhe për foshnjat nën moshën një vjeç, me pranimin e prindërve.
Por ligji nuk është i qartë sa i përket fëmijëve 1-12 vjeç, pasi autoritetet vazhdojnë të debatojnë nëse fëmijët e kësaj moshe janë në gjendje të marrin një vendim të tillë.
De Jonge shpjegoi se studimi i kryer me urdhër të ministrisë sugjeron se eutanazia mund të zbatohet për 5-10 fëmijë çdo vit.
“Studimi tregon se është e nevojshëm t’i jepet fund jetës së fëmijëve me sëmundje të pashërueshme, të cilët vuajnë tmerrësisht dhe që pritet të ndërrojnë jetë në një afat kohor të parashikueshëm” shkroi ministri holandez në një letër drejtuar parlamentit.
Parlamenti do të diskutojë çështjen të enjten ndërsa qeveria synon të fusë në fuqi masën në muajt e ardhshëm.
Holanda dhe Belgjika u bënë vendet e para në botë që legalizuan eutanazinë në vitin 2002.
Belgjika miratoi eutanazinë e të miturve në 2014, e ndjekur shumë shpejt nga Holanda.
\Gazetareforma.al\
