Greqia ka vendosur të pezullojë për tre muaj shqyrtimin e kërkesave për azil nga personat që mbërrijnë nga Afrika e Veriut.
Vendimi u njoftua nga kryeministri Kyriakos Mitsotakis gjatë një seance parlamentare, në një kohë kur vendi po përballet me një rritje të ndjeshme të fluksit të migrantëve.
Sipas Mitsotakis, masat e reja do të përfshihen në një projektligj që pritet të dorëzohet në parlament. “Për ata që mbërrijnë në mënyrë të paligjshme nga Afrika e Veriut nëpërmjet detit, shqyrtimi i kërkesave për azil do të pezullohet për një periudhë tremujore,” deklaroi ai.
Kryeministri shtoi gjithashtu se të gjithë emigrantët që hyjnë në mënyrë të paligjshme në territorin grek do të arrestohen dhe ndalohen.
Ky vendim vjen pasi rreth 2,000 migrantë dhe refugjatë kanë zbarkuar në Kretë vetëm gjatë fundjavës së fundit, duke shkaktuar reagime të forta nga autoritetet vendore dhe përfaqësues të sektorit turistik.
