Dhomat e Specializuara të Kosovës në Hagë kanë vendosur të vazhdojnë masën e paraburgimit për ish-presidentin e Kosovës, Hashim Thaçi.
Së bashku me Thaçin, në paraburgim do të mbeten edhe Bashkim Smakaj, Isni Kilaj dhe Fadil Fazliu, të cilët, bashkë me ish-ministrin e Drejtësisë, Hajredin Kuçi, po përballen me akuza për vepra penale që lidhen me pengimin e administrimit të drejtësisë.
Sipas gjykatëses së procedurës paraprake, vazhdimi i paraburgimit është një masë e nevojshme dhe proporcionale në kushtet aktuale të procesit.
Në vendimin e saj, gjykata argumenton se për ish-presidentin Thaçi vijon të ketë dyshime të arsyeshme për përfshirje në veprat penale për të cilat akuzohet, ndërsa ekziston rreziku i arratisjes dhe i ndërhyrjes në procedurat gjyqësore.
