Gjykata e Posaçme ka vendosur që kryebashkiaku i Tiranës, Erion Veliaj, të qëndrojë në burg, duke refuzuar kërkesën për ndryshimin e masës së sigurisë.
Ndërkohë, për biznesmenin Elman Abule është caktuar masa e sigurisë “arrest shtëpie”, dhe jo “detyrim paraqitje” siç ai kishte kërkuar.
Elman Abule u arrestua më 10 shkurt, por Apeli i Gjykatës së Posaçme ndryshoi masën në “arrest shtëpie” më 13 mars.
Abule akuzohet për pastrim parash, si pjesë e hetimeve që po zhvillohen nga Prokuroria e Posaçme kundër Korrupsionit dhe Krimit të Organizuar.
Veliaj mungoi në seancën e sotme, ndërsa Abule ishte prezent. Avokati i kryebashkiakut kërkoi ndryshimin e masës së sigurisë, duke ofruar garanci pasurore, por kjo kërkesë u refuzua nga gjykata.
Gjatë seancës, SPAK paraqiti 82 veprime hetimore të kryera gjatë dy muajve të fundit, duke argumentuar se nuk ishin plotësuar kushtet për ndryshimin e masës.
Prokuroria solli si provë të re faktin që apartamenti mbi banesën e Veliajt është në pronësi të përbashkët të çiftit Xoxa-Veliaj.
Arrestimi i Erion Veliajt ndodhi më 10 shkurt në zyrën e Bashkisë, ku ai u dyshua për veprat penale “Korrupsion pasiv i funksionarëve të lartë shtetërorë ose të zgjedhurve vendorë” në bashkëpunim (9 herë), “Pastrim i produkteve të veprës penale ose aktivitetit kriminal” dhe “Refuzim, mosdeklarim, fshehje ose deklarim i rremë të pasurive dhe interesave private nga persona të zgjedhur apo nëpunës publikë”. Bashkëshortja e tij, Ajola Xoxa, është vënë nën masën e sigurisë “detyrim paraqitje”.
Sipas SPAK-ut, nga të dhënat e mbledhura deri tani, Veliaj dhe bashkëshortja e tij kanë krijuar dhe përdorur një mekanizëm që i ka mundësuar përfitime të paligjshme nga fondet publike të Bashkisë Tiranë, duke i destinuar ato për pasurimin e tyre personal dhe familjar, përmes veprimeve të kamufluara dhe kundërligjshme.
