Edhe një herë Arben Frroku rikthehet në vëmendje dhe këtë herë, për shkak të mohimit të tij për t’u ekstraduar nga Holanda në Shqipëri.
Arben Frroku është biznesmeni i dënuar me burgim të përjetshëm nga gjykata shqiptare për vrasjes e kryekomisarit Dritan Lamaj dhe pas kapjes së tij në Holandë, pritej ekstradimi, mirëpo kjo nuk do të ndodhë pasi ka një vendim të Gjykatës së Apelit të të Drejtave të Njeriut në Hagë, tek i cili saktësohet se rikthimi i Frrokut në vendlindje mund të rezultojë fatal për jetën e tij.
Këtë vendim, biznesmeni e ka marrë pasi ka animuar vendimin e Gjykatës së Shkallës së Parë Holandeze, tek e cila miratohej kjo shpërngulje.
Sipas vendimit të refuzimit shkak për mosekstradimin e Arben Frrokut është bërë përfshirja e politikës në procesin ndaj tij si dhe rrezikimi i jetës në Shqipëri, pasi ai është i dënuar përjetë për një krim që pretendon që nuk e ka kryer. Për akuzën e vrasjen së Dritan Lamaj Arben Frroku fillimisht mori pafajësi nga Gjykata e Shkallës së Parë për krimet e rënda. Pas këtij vendimi ai u largua nga Shqipëria nëpërmjet Malit të Zi.
Më tej prokuroria ankimoi vendimin dhe Apeli i Krimeve të Rënda e dënoi Arben Frrokut me burgim të përjetshëm duke e ribërë sërish njeriun më të kërkuar për vrasjen e kryepolicit. Prej atij momenti Arben Frroku qëndroi jashtë vendit deri sa u arrestua në Holandë me dokumente false greke. Rekursi i tij në Gjykatën e Lartë dhe Kushtetuese nuk u pranua duke lënë në fuqi dënimin me burg përjetë.
Aktualisht këtë dënim Arben Frroku e ka ankimuar në Gjykatën e Strasburgut ku mbetet në pritje të shqyrtimit të këtij ankimi.
Mirëpo mesa duket planet janë të tjera. Burime të Report Tv, kanë bërë me dije se deri në një vendim për themelin e çështjes nga Strasburgu, Arben Frroku do të qëndrojë në Holandë ku pas pak javësh pritet të rikthehet në liri.
