Janë liruar 34 demokratët e arrestuar gjatë protestës së 8 janarit në selinë e Partisë Demokratike. Gjykata e Tiranës ka dhënë vendimin “detyrim paraqitje” për 19 protestues, ndërsa 15 prej tyre janë liruar pa masë. Pas kësaj ka reaguar Albana Vokshi. Sipas saj, Policia e prokuroria dështuan të dëshmonin qoftë edhe një provë të vetme për t’i implikuar. Ajo akuzon dyshen Rama-Basha për skenar dhune, më 8 janar.
Albana Vokshi:
Edhe seanca e sotme për masën e sigurisë së 18 protestuesve dëshmoi se protesta u thirr, u organizua paqësore dhe ishte e tillë deri në fund, u vërtetua që ishin arrestuar në mënyrë të paligjshme. Policia e prokuroria dështuan të dëshmonin qoftë edhe një provë të vetme për t’i implikuar. Të gjithë protestuan në mënyrë paqësore. U shoqëruan në ambientet larg selisë së PD-së. Arrestimet e protestuesve janë bërë me lista të përgatitura e shpërndara nga brenda partisë për të çuar deri në fund skenarin Rama-Basha për mbrojtjen e karriges së Bashës. As organet ligjzbatuese nuk kanë reaguar në kohën e duhur pavarësisht se më 6 janar është raportuar për persona të armatosur, e mercenarë me pagesë, me të shkuar kriminale me 20-25 vjet burg në vendet fqinje, por nuk u reagua për ta kthyer PD-në. Të 18 protestuesit janë heronj të demokracisë.
