Apeli i GJKKO-së ka vendosur të lërë në fuqi masën e sigurisë “arrest me burg” për Bujar Shegën, i njohur edhe me emrin Marsel, i arrestuar si pjesë e grupit kriminal të drejtuar nga Suel Çela.
52-vjeçari u ekstradua nga Italia në prill 2025 dhe konsiderohet nga SPAK si truri financiar i këtij rrjeti kriminal që operonte kryesisht në Elbasan.
Sipas hetimeve, Shega dyshohet për përfshirje në trafikim të lëndëve narkotike dhe pastrim parash, të kryera në kuadër të një grupi të strukturuar kriminal.
Prokuroria e Posaçme pretendon se ka siguruar prova që e lidhin atë me operacione financiare dhe veprimtari të paligjshme që shtrihen brenda dhe jashtë territorit shqiptar.
Kush është Suel Çela?
I shpallur në kërkim në maj 2022 si pjesë e operacionit “Plumbi i Artë”, Suel Çela akuzohet se ka porositur tri ngjarje kriminale, dy prej të cilave nuk u realizuan dhe një tjetër mbeti në tentativë. Në qendër të hetimeve është atentati i dështuar ndaj Elton Kilës më 29 mars 2022, për të cilin dëshmitari i drejtësisë, Nuredin Dumani, ka deklaruar se ishte porositur nga Çela.
Çela ka pasur më herët probleme me drejtësinë, përfshirë një dënim në Itali për trafik droge, nga i cili arriti të shpëtonte burgut. Ai u bë i njohur për publikun pas incidentit të vitit 2017 në Elbasan, ku një makinë e blinduar, e quajtur “Auditi i zi”, u përplas me makinën e zëvendësdrejtorit të policisë. Për këtë ngjarje, ai u shpall i pafajshëm nga gjykata për mungesë provash, ndërsa bashkëpunëtori i tij u dënua si autor i incidentit.
Suel Çela nuk ka pasuri të regjistruara në emër të tij, pavarësisht lidhjeve familjare me biznesin. I ati zotëron tregun agro-ushqimor të Elbasanit, në të cilin ndodhi edhe përplasja me policinë që tronditi vendin tetë vite më parë.
