Gazetarja Klodiana Lala ka dhënë detaje të reja në lidhje me vrasjen e Endri Mustafës në Shkodër, trupi i të cilit u gjet një ditë më parë. Lala tha në emisionin “Open” se telefoni celular i viktimës është gjetur vetëm mëngjesin e ditës së tretë, pra autorët kanë pasur kohë për të kontrolluar. Po ashtu, në vendngjarje është gjetur edhe një pistoletë që nuk dihet ende se kujt i përket.
“Telefoni celular i viktimës nuk është gjetur, është gjetur mëngjesin e ditës së 3, autorët kanë patur kohë për të rrëmuar. Detaji i dytë është një pistoletë e gjetur në vendin e ngjarje, për të cilën policia nuk jep detaje nëse i përket viktimës. Nëse i përket viktimës përse lëvizte i armatosur? Nëse kjo pistoletë ju përket autorëve, praktikisht i bie të jetë i autorëve”, tha Lala.
Gazetarja e ka cilësuar vrasjen e Endri Mustafës tipike mafioze, ndërsa tha se 15-vjeçari është përdorur si karrem për ta nxjerrë nga shtëpia viktimën. Endri Mustafa u gjet ditën e djeshme pranë liqenit, i ekzekutuar me 6 plumba dy prej të cilëve e kishin prekur në gojë dhe në kokë.
Lala tha ndër të tjera se autorët janë siguruar të mos e linin gjallë Mustafën, ndërsa është shprehur kritike për policinë pasi kanë shpallur në kërkim Ibrahim Licin, për të cilin thonë se nuk kanë dhënë asnjë detajë se përse është autori i dyshuar i ngjarjes.
