Gazetari Ferdinand Dervishi ka qenë i ftuar së fundmi në emisionin “Frontline” në Report Tv, ku foli lidhur me SPAK dhe hetimet e rëndësishme që po kryen dhe që priten të kenë zhvillime të mëdha.
Dervishi tha se SPAK po kryen hetime mbi dosjen e pronave të forcave detare, ku zbuloi mes të tjerash se në një prej 25 celularëve që u janë sekuestruar ushtarakëve dhe zyrtarëve të lartë të ministrisë së Mbrojtjes. Në një nga celularët është gjetur një video ku një ushtarak shihet teksa kryen marrëdhënie seksuale brenda zyrës së tij.
“Janë sekuestruar 25 telefona ushtarakësh dhe duke u hapur një telefon gjendet edhe një situatë marrëdhënie seksuale në një zyrë shteti që po hetohet më vete. Pra në një celular të një ushtaraku, zyrtari të lartë të ministrisë së Mbrojtjes në zyrën e vet”- tha Dervishi.
Gazetari tha se kjo dosje vuluminoze ka sjellë hetime edhe më të gjëra, ku përfshihet edhe ministria e Infrastrukturës si dhe disa çështje të tjera, si ndryshimi i selisë së disa institucioneve të ministrisë së Mbrojtes pa marrë miratimin e presidentit të republikës, asokohe Ilir Metës.
Ai tha se për këto dosje janë marrë në pyetje mbi 30 persona, mes tyre presidenti Bajram Begaj asokohe shef i shtabit të përgjithshëm të ushtrisë, Bardhyl Kollçaku, ish-shef i shtabit të përgjithshëm, Olta Xhaçka ish-ministre e Mbrojtjes, Ilir Xhebexhia, ish-komandat i forcës detare.
Gjithashtu sipas Dervishit, në hetim është edhe blerja e helikopterëve të rinj, çështja për muzeun ‘sekret’ për të cilin u caktuan 6 milionë euro gjatë pandemisë kur shpenzimet e ministrisë së Mbrojtjes ishin të kufizuara.
