Më 27 prill, Partia e Lirisë do të mbajë Konventën Kombëtare ku pritet të zgjidhet udhëheqja e re e partisë. Kryetari aktual, Ilir Meta, ka deklaruar tashmë kandidaturën e tij për të qenë president i partisë. Së fundmi, edhe një anëtar i partisë, Faik Basha, ka njoftuar se do të kandidojë për të njëjtin post.
Faik Basha, aktualisht Kryetar i Partisë së Lirisë në Kamëz dhe anëtar i Kryesisë së partisë, ka bërë të ditur aspiratat e tij përmes një postimi në rrjetet sociale: “Kam vendosur të kandidoj për President të Partisë së Lirisë. Dua të jem zëri i njerëzve të thjeshtë dhe të kontribuoj në përparimin e Shqipërisë.”
Basha ka një historik të gjatë në shërbim publik, duke filluar si oficer në Forcat e Armatosura të Shqipërisë dhe më pas në Ministrinë e Drejtësisë. Ai vuri theksin në eksperiencën dhe integritetin e tij profesional: “Jam i paangazhuar në asnjë skandal dhe kam për qëllim të përdor të gjithë formimin tim, profesionalizmin dhe kapacitetin tim për të mirën e vendit.” Ai shprehu vendosmërinë për të luftuar kundër qeverisjes së keqe, krimit dhe korrupsionit të madh, të cilat sipas tij, kanë përfshirë Shqipërinë.
