Leonard Mnella, i ekstraduar nga SHBA vitin e kaluar, është dërguar sot në Itali për t’u përballur me drejtësinë. Ai është njohur si një nga kriminelët më të kërkuar, me tre identitete të ndryshme dhe me një histori të gjatë kriminale.
Mnella, i njohur gjithashtu si Leon Kolmnela dhe Leonard Kolmnela, kishte falsifikuar vdekjen e tij që në vitin 2003, duke u deklaruar i vdekur në Amerikën Latine.
Arrestimi i tij u realizua në vitin 2024 në Miçigan, SHBA, falë bashkëpunimit mes policisë shqiptare dhe agjencive amerikane.
Në Itali, ai është dënuar me 25 vite burg për një sërë veprash penale, duke përfshirë bashkëpunimin në organizatë kriminale, rrëmbim personi, tentativë zhvatjeje, trafik droge në sasi të mëdha dhe mbajtje pa leje të armëve.
Mnella drejtonte një rrjet të trafikut ndërkombëtar të drogës që lidhte Amerikën Latine, Italinë dhe Shqipërinë. Ai ka qenë gjithashtu i përfshirë në trafik heroinë në provincën e Salernos në fund të viteve ’90 dhe fillim të 2000-ës, dhe akuzohet për një rrëmbim në Piemonte në vitet ’90.
Pas humbjes së gjurmëve dhe falsifikimit të vdekjes, Mnella u gjet pas më shumë se dy dekadash në SHBA, ku u arrestua dhe më pas u ekstradua në Shqipëri për t’u dërguar në Itali, ku do të vuajë dënimin e tij.
