Një ngjarje e rëndë është regjistruar mëngjesin e ditës së sotme në fshatin Ujz të Gjakovës ku një shtëpi është përfshirë e gjitha nga flakët. Autoritetet e policisë janë lajmëruar rreth një orë më parë dhe menjëherë kanë arritur në vendin e ngjarjes së bashku me të gjitha njësitë e nevojshme, përfshirë këtu edhe shërbimet e emergjencës.
Policia ka konfirmuar se zjarri është në zhvillim e sipër, duke mos bërë dot të mundur shuarjen totale të tij teksa në një nga dhomat e shtëpisë dy katëshe dyshohet se kanë qenë duke qëndruar edhe dy fëmijë të moshës 10-13 vjeç, të cilët se ishin kushërinj me njëri-tjetrin.
Lumni Graishta, drejtor në Policinë Rajonale të Gjakovës, ka deklaruar për mediat kosovare se dy të miturit nuk kanë mundur t’i shpëtojnë plagëve të marra dhe për pasojë kanë ndërruar jetë. Policia tha se për rastin është në përgatitje të një raporti, mirëpo e konfirmoi shkurt vdekjen e dy fëmijëve.
“Presim konstatimin e mjekut, zjarri është në zhvillim e sipër. Fëmijët janë të gjinisë mashkullore, 10-13 vjeç”, tha Graishta.
Në vend ngjarje janë të gjitha njësitë e nevojshme si policia, zjarrëfikësit dhe mjekësia ligjore. Ndërsa nuk dihen ende shkaqet e plota se nga çfarë arsye mund të ketë ndodhur ngjarja e rëndë ku humbën jetën dy të miturit.
