Vrasja e katër policëve nga Dritan Dajti, duket se nuk do të hidhet me thjeshte 25 vite burg ashtu siç ka përcaktuar Gjykata e Apelit të Krimeve të Rënda.
Pas dhënies së këtij vendimi, si rezultat i gjykimit të shkurtuar, ka folur edhe KLGJ, ku përmes një njoftimi zyrtar ka bërë me dije se gjyqtarët që janë marrë me këtë çështje janë nën hetim
Duket se gjyqtarët nuk e kanë marrë seriozisht çështjen dhe kanë dhënë një mendim selektiv, ndryshe nga çfarë pritej të ndodhte dhe sipas KLGJ-së ata kanë kryer shkelje të rënda profesionale dhe etike.
“Këshilli i Lartë Gjyqësor, njofton opinionin publik, se pranë tij, është depozituar kërkesa e Ministrit të Drejtësisë, në të cilën kërkohet hetimi disiplinor i veprimtarisë së anëtarëve të trupës gjyqësore, që kanë gjykuar çështjen kundër të dënuarit Dritan Dajti, me arsyetimin se këta gjyqtarë, kanë kryer shkelje të rënda profesionale dhe etike që diskreditojnë pozitën dhe figurën e gjyqtarit gjatë ushtrimit të detyrës, shkak mbi të cilin ka kërkuar në vijim edhe marrjen e masës së shkarkimit nga detyra.
Nisur nga kjo kërkesë, Këshilli i Lartë Gjyqësor, informon publikun se kjo çështje do të trajtohet me përparësi, paanshmëri dhe profesionalizëm. Këshilli do të bëjë vlerësimin e duhur, në përputhje me kuadrin e ri ligjor dhe do të ndërmarrë çdo veprim të nevojshëm në respektim të ligjit”, njofton KLGJ.
