Kreu i Partisë Demokratike Lulzim Basha ka zgjedhur ditën e sotme drejtuesin e ri politik të qarkut të Lezhës, pas dorëheqjes së Mark Markut. Mësohet se ky post iu besua Agron Gjekmarkajt.
Vendimi është njoftuar ditën e sotme në mbledhjen e kryesisë grupit parlamentar, ku ndër të tjera ka patur edhe debate për s ai përket çështjes së ish-kryeministrit Sali Berisha.
Gjekmarkaj, ashtu si Mark Marku, kandidoi në qarkun e Lezhës ku arriti të fitonte mandatin e deputetit. Kujtojmë që Marku dha dorëheqjen e tij pasi u zgjodh deputet, duke mos rënë dakord me mënyrën e të bërit opozitë nga Partia Demokratike.
Ndërkohë, në mbledhjen e sotme të kryesisë së grupit parlamentar pati debate të shumta. Enkelejd Alibeaj tha pas mbledhjes se u diskutua për strategjinë e opozitës në parlament, ndërsa më vonë do të detajohet puna edhe në komisione. Gjithashtu mësohet të ketë pasur debate mes Lulzim Bashës dhe Flamur Nokës, në lidhje me vendimin që ky i fundit mori për të përjashtuar nga grupi parlamentar i PD-së, ish-kryeministrin Sali Berisha.
Përjashtimi i Berishës nga grupi i PD-së ka sjell debate të forta politike, brenda selisë blu. Ndër të tjera, ish-kryeministri Berisha ka nisur një tur takimesh me demokratët në të gjithë vendin, për një PD më të fortë dhe më të bashkuar, siç është shprehur ai.
