COVID-19 vijon të përhapet me shpejtësi dhe të thellojë bilancin e viktimave dhe të prekurve në rang botëror, pasi deri tani janë shënuar 108,865 viktima dhe 1,781,383 të infektuar, teksa 404,581persona janë shëruar.
Kina vendi ku shpërtheu COVID-19 ka zbritur shumë poshtë në klasifikimin botëror me 82,052 të infektuar dhe 3,339 viktima, teksa disa ditë më parë mediat u pushtuan nga fotot e videot nga Uhani, që iu rikthye jetës normale.
Mirëpo, në shtetin kinez po vihet re gjithnjë e më shumë rritja shqetësuese e numrit të rasteve të importuara brenda ditës.
Numri i rasteve të reja me koronavirus të importuar arriti një rekord të ri duke dyfishuar numrin ditor të të infektuarve të rinj, pasi në 24 orët e fundit rastet e reja të konfirmuara në territorin e Kinës arritën në 99 nga 46 që ishin një ditë më parë.
Në qendrën tregtare Shanghai, 51 shtetas kinezë që kishin qenë në të njëjtin fluturim nga Rusia rezultuan positive ndaj COVID-19, teksa Wen Guohui, kryetar i Guangzhou, një qendër ekonomike në Kinën Jugore u shpreh të dielën se rreziku i rasteve të importuara është rritur në mënyrë dramatike.
‘Guangzhou po zbaton masat antivirus për këdo që hyn në qytet nga përtej kufirit kombëtar, pavarësisht kombësisë, racës apo gjinisë’, tha zyrtari i punëve të jashtme Liu Baochun në të njëjtën ngjarje.
Tashmë për vendin janë rritur shqetësimet për një valë të dytë duke marrë parasysh numrin e rasteve të “importuara” që po rritet me ritme shqetësuese.
Kina po rrit kontrollin e të huajve që kanë hyrë në shtetin e tyre si dhe ka rritur vigjilencën në pikat kufitare, teksa nuk dihet nëse do i mbyll sërish kufijtë.
