Vijon vaksinimi në vendin tonë! Ditën e sotme e marrin dozën e dytë të vaksinës anti COVID, edukatorët, mësuesit dhe pedagogët.
Lajmin e ka bërë të ditur Ministrja e Shëndetësisë dhe Mbrojtjes Sociale, Ogerta Manastirliu e cila mbikqyri nga afër procesin e vaksinimit në stadiumin “Air Albania”. Manastirliu ka theksuar se është shumë e rëndësishme që edhe doza e dytë e vaksinës të bëhet sipas kalendarit të vaksinimit.
“Është shumë e rëndësishme që edhe dozat e dyta të bëhen sipas kalendarit të vaksinimit për të gjitha kategoritë, për të gjitha grupmoshat edhe për të gjitha llojet e vaksinave. Sot kemi vaksinimin e mësuesve, pedagogëve, edukatorëve. Ndërkohë që në sheshin “Skënderbej” dhe në të gjithë pikat e tjera vijon vaksinimi sipas grupmoshave, duke vijuar edhe me të gjithë pjesën tjetër të qytetarëve, të cilët kanë sëmundje kronike dhe i përkasin moshës deri 60 vjeç”, tha Manastirliu.
Ministrja e Shëndetësisë ka thënë më tej se po vijojnë vaksinimet me të njëjtin kujdes dhe me të njëjtin ritëm, për të mbrojtur sa më shumë qytetarë. A joka thënë se kategoria e mësuesve është shumë e rëndësishme sepse na jep një lehtësim shumë të madh.
“Ne vijojmë me të njëjtin kujdes edhe me të njëjtin ritëm, për të mbrojtur sa më shumë qytetarë, sipas grupmoshave por edhe kategorive më të rrezikuara. Kategoria e mësuesve është shumë e rëndësishme sepse na jep një lehtësim shumë të madh për vijimin e qëndrueshëm të vitit shkollor që fillon në shtator”, tha Manastirliu.
Mbi 40 mijë pedagogë, mësues dhe edukatorë janë vaksinuar, nga të cilët rreth 11 mijë i kanë kryer të dy dozat e vaksinës.
Që prej nisjes së procesit të vaksinimit janë mbi 816 mijë qytetarë të vaksinuar, nga të cilët, 320 mijë i kanë kryer të dy dozat e vaksinës anticovid.
Kujtojmë se në vendin tonë shifrat e të vaksinuarveka arritur në 800 mijë. Ndërkohë që deri më tani, vaksinimi është mbyllur për bluzat e bardha; efektivët e Policisë; punonjësit e transportit publik, etj. Ndërsa tek të moshuarit, është kapur fasha e vaksinimit +65 vjeç.
