Afati për marrjen e vendimit për çështjen e “Plepave të Brukës” është shtyrë përsëri dhe arsyeja për këtë është bërë mungesa e aktit të ekspertimit, e caktuar si detyrë nga Gjykata Administrative për ekspertët e çështjes në fjalë.
Një akt ekspertimi shtesë ishte parashikuar të diskutohej në seancën e sotme, mbi të cilin do të përcaktohej se sa është dendësia reale e pemëve në të gjithë sipërfaqen e “Plepave të Brukës”.
Në 6 korrik, gjykatësi kërkoi nga ekspertët që të bënin numërimin fizik dhe real të pemëve e të përcaktonin se në cilat pjesë ishte dendësia më e madhe.
“Ekspertët e kishin si detyrë nga Gjykata ta dorëzonin aktin më datë 26 korrik, ne ta tërhiqnim për analizim dhe sot të diskutohej. Ata nuk e sollën as sot aktin e ekspertimit për arsye se vëzhgimi në terren është kryer vetëm para pak ditësh, në të cilin kemi qenë bashkë me banorët prezentë.”- u shpreh Dorina Nreka, avokate e palës paditëse, banorëve të Laknasit, pasi doli nga seanca, bën me dije nyje.al.
Si pasojë mungesës së aktit të ekspertimit, gjithë procesi gjyqësor është shtyrë, pasi diskutimet mbi themelin e çështjes janë kryer. Seanca e radhës ëhstë parashikuar në 20 tetor dhe pritet që palët të kenë në dorë aktin të analizuar dhe të diskutojnë për kërkesat që janë ngritur në vazhdimësi të procesit, për të cilat do duhet një ekspertizë shtesë.
Gjykata gjobiti dy ekspertët për shkelje të rëndë të Kodit të Procedurës, me nga njëqind mijë lekë secili dhe u është kërkuar dorëzimi i aktit të ekspertimit brenda dhjetë ditësh. Rasti është i përsëritur, pasi ekspertët janë gjobitur edhe më parë për neglizhimin e detyrave. Gjykatësi ka paralajmëruar rritje progressive të gjobës nëse vazhdon sjellja e njëjtë.
Përballë gjithë këtyre, banorët e Laknasit ndjekin seancat dhe janë të vëmendshëm ndaj tentativave të firmës Bioproducts për ndërhyrje në pyll. Tentativa e fundit nga firma ishte në përfundimm të muajit gusht.
