Tiranë- Në protestën që po zhvillohet përpara bashkisë së Tiranës, regjisori i njohur Edmond Budina ka shprehur një falënderim të thellë për pjesëmarrësit që po qëndrojnë në këmbë kundër korrupsionit të pretenduar të kryebashkiakut Erion Veliaj. “Dua që në emër të Aleancës për Mbrojtjen e Teatrit t’ju falënderoj për këtë qëndresë heroike,” tha Budina në fjalën e hapjes së protestës.
Budina vazhdoi të flasë me tone të forta kundër asaj që ai e quajti “folenë e grenzave” dhe “folenë e mafiozëve”, duke akuzuar drejtpërdrejt administratën e bashkisë për vjedhje të fondeve publike. “Shikojeni të dashur miq, këtu përballë ne kemi folenë e grenzave, folenë e mafiozëve, e hajdutëve që na vjedhin paratë tona prandaj ne jemi këtu për t’u treguar që e kemi me folenë e tyre të grenxave,” theksoi ai.
Ai shtoi se duket se edhe opinioni publik ndërkombëtar po fillon të zbulojë dhe të denoncojë sjelljet e këtyre zyrtarëve. “I keni parë dhe të gjithë jeni dëshmitarë sesi dhe opinioni publik botëror po i nxjerr lakrat, po i nxjerr llumin këtij shteti mafioz, të lidhur me bandat,” tha Budina.
Protesta, e cila përfshin anëtarë të Aleancës për Mbrojtjen e Teatrit, qytetarë dhe përfaqësues të opozitës synon audit të jashtëm në Bashkinë Tiranë dhe dorëheqjen e Erion Veliajt.
“Prandaj ne qytetarë duhet të revoltohemi dhe nuk ka gjë që na ndal derisa ta largojmë këtë bandë mafioze, këtë bandë kriminelësh dhe nuk ka opinion ambasadash që të na pengojë. Jemi ne që e vuajmë në kurriz. Nuk janë ata që që e vuajnë në kurriz atë ç’ka heqim prej mafiozëve shqiptarë,” përfundoi Budina.
