Borxhi i Shqipërisë sot, sipas shifrave zyrtare është 1.265.126 miliard lekë, ose 80,02% e Prodhimit të Brendshëm Bruto. PD dhe PS pasi ua ngarkuan shqiptarëve në kurriz këtë mal me para për t’u shlyer në breza po grinden me deklarata se kush ka vjedhur më shumë nga kjo shumë.
Partia Demokratike, me anë të Dorian Telitit e hapi këtë çështje duke hedhur përgjegjësinë tek qeveria Rama. “2006-2013 borxhi publik u rrit me vetëm 10% të PBB-s. Ndërsa 2014-2020, borxhi u rrit me 29% të PBB-së”, deklaron PD.
Duke iu referuar deklaratave të opozitës, Kryeministri Edi Rama, tha se ata që e zhytën Shqipërinë në borxhe kanë një dallim të madhe me qeverinë socialiste.
“Mirëmëngjesi dhe meqë dëgjoni llafe shumë për Borxhin Publik nga ata që e zhytën Shqipërinë në borxhe ndaj sipërmarrjes, shëndetësi, arsim e deri edhe ndaj personave me aftësi të kufizuar, të prekurve nga përmbytjet, e madje edhe bebeve të porsalindura që i lanë pa mikrobonusin 5 mijë Lekë, njësoj si rrugët e lëna rrugëve, me këtë krahasim fare të thjeshtë për ta kuptuar dallimin e madh mes tyre e nesh, ju uroj një ditë të mbarë”, shkruan Rama.
Në grafikun e Ramës ka një interpretim ndryshe të borxhit. Kemi marrë 46 miliardë lekë borxh dhe kemi investuar 79 miliardë lekë, kurse PD mori 60 miliardë lekë borxh dhe investoi 70 miliardë lekë. Pra, sipas Ramës borxhi qenka ulur. Por Ministria e Financave që e raporton cdo 3 muaj këtë borxh, thotë se borxhi në vlerë është rritur, ka shkuar në 80 për qind të PBB-së. Rama na sugjeron të mos e shohim ashtu si është, por të shohim rrugët virtuale që ka mbyllur, aeroportet, hekurudhat, shtëpitë e e rindërtuara pas tërmetit…
E megjithatë borxhi në vlerë absolute është rreth 12 miliardë euro, dhe nuk ka ndonjë premtim (të paktën gënjeshtër elektorale) se sa do ta ulë secila parti, nëse do të jetë në qeveri katërvjeçarin e ardhshëm.
/GazetaReforma.com/
