Qeveria shqiptare është kapur përballë një muri europian. Komisioni Europian paralajmëroi se kapitulli i bujqësisë nuk do të hapet pa çuar në gjykatë hajdutët e 138 milionë eurove të IPARD II. Dhe këta hajdutë nuk janë anonimë: janë ish-drejtorë, ministra dhe klientë të pushtetit që i shndërruan grantet e fermerëve në vila, resorte dhe hotele.
Dosja është gati që prej vitit 2021, kur OLAF e depozitoi në SPAK kallëzimin penal për Frida Krifcën. Katër vjet më pas, SPAK i Altin Dumanit ende nuk ka regjistruar një çështje penale. Krifca jo vetëm që nuk u hetua, por u shpërblye nga kryeministri Rama me poste të reja qeveritare, madje si këshilltare për fondet e BE-së në Kryeministri.
Një skemë tradhtie ndaj një sektori ku shqiptarët mbijetojnë çdo ditë. Ndërsa blegtorët derdhin qumështin në kanale sepse nuk arrijnë të shesin produktin, militantët e pushtetit marrin kredi pa interes për shtëpi të reja. Ndërsa fermerëve u thahen arat për mungesë uji dhe prodhimet kalben në magazina, administrata e fryrë me mbi 130 mijë punonjës paguhet me fonde që ishin destinuar për farëra, pleh dhe naftë. Nga çdo 100 lekë të buxhetit për bujqësinë, 55 shkojnë për këtë aparat burokratik që nuk prodhon gjë tjetër veçse patronazh elektoral.
Në vend që të lejohej drejtësia të hetonte, qeveria pagoi 376,800 euro për një kompani të huaj që të “hetonte” atë që OLAF e kishte hetuar e dokumentuar prej kohësh. Një farsë tenderi, me fitues të paracaktuar, që e kthen absurdin në strategji shtetërore: të mbulohet vjedhja me raporte të shtrenjta, të fitohet kohë dhe të mbeten të paprekur të njëjtët njerëz që shkatërruan fondet e fermerëve.
Ndërkohë fqinjët tanë ecin përpara. Serbia siguroi 288 milionë euro nga IPARD III për modernizimin e bujqësisë. Shqipëria bllokim, mashtrime publike të Edi Ramës që shpall kapituj të hapur që nuk ekzistojnë, dhe përgënjeshtrime të turpshme nga Delegacioni i BE-së.
Realiteti është ky: ndërsa ndërtimi rritet me 14% dhe importet bujqësore me 20%, tokat shqiptare lihen djerr për mungesë mbështetjeje. Ndërsa qeveria paguan qindra mijëra euro për raporte “forensic”, fermerët braktisin fshatin. Ndërsa vilat e ndërtuara me fondet e IPARD presin turistë, bujqësia shqiptare fundoset në mjerim.
Pushteti që shpërblen veten, administrata paguhet për vota, SPAK-u hesht dhe kryeministri mashtron hapur mbi negociatat me BE. BE e tha qartë: pa gjykuar hajdutët nuk ka kapitull. A do të kemi ndonjëherë drejtësi, apo do të vazhdojmë të paguajmë hajdutët për të zbuluar hajdutët?
Një tradhti kombëtare ndaj fermerëve shqiptarë, ndaj bujqësisë dhe ndaj vetë integrimit europian të vendit. Dhe përgjegjësit janë të gjithë: qeveria që grabiti, SPAK-u që heshti, dhe një sistem që ka vendosur të mbajë peng të ardhmen e vendit për interesat e një grushti pushtetarësh.
