Artan Hoxha: Sistemi që krijoi Rama do ta rrëzojë vetë, rrezikojmë krizë më të rëndë se vitet ’90

Gazetari Artan Hoxha deklaroi se sistemi i ngritur nga kryeministri Edi Rama po kthehet në barrë për vetë qeverinë dhe paralajmëroi se shembja e tij mund ta përfshijë vendin në një krizë ekonomike më të rëndë se ajo e viteve ’90 apo 1997. Deklaratat ai i bëri gjatë emisionit “A Show” me Adi Krastën në SYRI TV, ku analizoi zhvillimet e fundit politike, protestat kundër qeverisë dhe raportin mes pushtetit, ekonomisë dhe krimit të organizuar.

Hoxha u ndal fillimisht te protestat, duke thënë se dalja e qytetarëve në shesh ishte një zhvillim që surprizoi edhe organizatorët. Sipas tij, në protesta morën pjesë shtresa e mesme, profesionet e lira dhe ai që e cilësoi si “elektorati gri”, një kategori që, sipas gazetarit, kishte munguar prej kohësh në skenën publike.

Ai tha se kryeministri Rama u gjend i papërgatitur për këtë reagim qytetar, ndërsa theksoi se sfida tani është që kjo pakënaqësi të përkthehet në mbështetje elektorale në zgjedhjet e ardhshme.

Në analizën e tij, Hoxha deklaroi se Rama nuk mund të largohet lehtësisht nga pushteti, pasi, sipas tij, është i lidhur me sistemin që ka ndërtuar gjatë viteve të qeverisjes.

Sipas gazetarit, një nga problemet më të mëdha të qeverisë është ajo që ai e cilësoi si simbiozë mes pushtetit dhe krimit të organizuar. Ai tha se kjo lidhje ka bërë që çdo veprim i qeverisë të kthehet në kosto politike dhe se çdo ditë që kalon rëndon më tej pasojat për vendin.

Hoxha shtoi se sistemi i ngritur gjatë këtyre viteve ka deformuar demokracinë, shoqërinë dhe mënyrën se si kontrollohen pasuria dhe ekonomia. Sipas tij, kontrolli mbi paranë dhe pushtetin është përqendruar në të njëjtat duar, duke e bërë shumë të vështirë rikthimin e situatës në normalitet.

Duke iu referuar ritmit të ndërtimeve në kryeqytet, ai tha se përqendrimi i investimeve në Tiranë është tregues i mënyrës se si është organizuar ekonomia. Në këtë kontekst, Hoxha paralajmëroi se nëse nuk gjendet një zgjidhje, shembja e këtij sistemi mund të ketë pasoja të rënda për të gjithë vendin.

Në përfundim, gazetari u shpreh se Shqipëria ndodhet në një moment kritik dhe se, sipas tij, rrezikon të përballet me një krizë ekonomike me pasoja edhe më të rënda se ato të viteve ’90 apo të vitit 1997.