Një tjetër zhvillim i rëndësishëm në hetimet për grupin kriminal të drejtuar nga Laert Haxhiu ka ndodhur në Britaninë e Madhe, ku është arrestuar Lorenc Lala, 47 vjeç, i njohur gjithashtu me identitetin Kristian Lala.
Ai është ndaluar nga Njësia për të Kërkuarit e NCA në bashkëpunim me Interpol Tirana, në kuadër të një kërkese për ekstradim të autoriteteve shqiptare.
Sipas dokumenteve gjyqësore të siguruara nga Top Channel, Lala kërkohet nga drejtësia shqiptare për akuzën e “konspiracionit për të kryer vrasje”, lidhur me atentatin ndaj Albi Bashaliut, të ndodhur në fshatin Gjocaj të Peqinit.
Prokuroria dyshon se ai ka porositur këtë vrasje për një shumë prej 50 mijë eurosh, të cilën ia ka dorëzuar Laert Haxhiut, i cili më pas ka organizuar ekzekutimin përmes pjesëtarëve të grupit të tij.
Bazuar në dëshminë e bashkëpunëtorit të drejtësisë, Artan Tafani, autorët e krimit janë: ai vetë, Lulzim Arapi, Bledar Berberi, Enrico Xhahysa dhe Laert Haxhiu.
Tafani ka treguar se pagesa është bërë nga vetë Lorenc Lala, ndërsa ekzekutimi është koordinuar nga Haxhiu.
Aktualisht, Lala ndodhet në paraburgim në Mbretërinë e Bashkuar për shkak të rrezikshmërisë së lartë dhe për përfshirjen e tij në një organizatë kriminale.
Seanca e radhës për çështjen e ekstradimit është caktuar për datën 24 qershor.
