Çmimet e naftës kanë shënuar rënie të ndjeshme pas lajmit për një marrëveshje armëpushimi mes Iranit dhe Izraelit, zhvillim që ka zbutur frikën e tregjeve për ndërprerje të furnizimeve nga Lindja e Mesme.
Nafta e papërpunuar amerikane West Texas Intermediate u tregtua me një rënie prej 3.7%, duke zbritur në 65.9 dollarë për fuçi.
Ndërkohë, Brent-i, që shërben si referenca globale për çmimet e naftës, ra me 3.8%, duke u pozicionuar në 68.8 dollarë për fuçi.
Gjatë natës, presidenti amerikan Donald Trump njoftoi në rrjetet sociale arritjen e një “armëpushimi të plotë dhe total” mes dy vendeve.
Ai konfirmoi më pas se marrëveshja kishte hyrë në fuqi. Edhe mediat në Iran dhe Izrael raportuan për nisjen e armëpushimit, megjithëse detajet mbeten të paqarta.
Vetëm një ditë më parë, çmimet e naftës kishin rënë me mbi 7% pas një vale sulmesh me raketa të ndërmarra nga Irani kundër disa bazave ushtarake amerikane në Katar.
WTI pësoi një rënie prej 7.2%, duke u ulur në 68.51 dollarë për fuçi, rënia më e madhe brenda një dite që nga fillimi i prillit dhe një nga më të thellat në tre vitet e fundit.
Ndërkohë, Brent-i u mbyll në 71.48 dollarë për fuçi, gjithashtu me 7.2% rënie, niveli më i ulët ditor që nga gushti i vitit 2022. Rëniet reflektuan qetësimin e menjëhershëm të tensioneve gjeopolitike dhe pritshmëritë për stabilizim në tregjet e energjisë.
