Agjencia e Mbikëqyrjes Policore (Rajoni Tiranë) ka arrestuar Inspektorin Briken Tereziu, 39 vjeç, pas shpalljes së tij në kërkim për akuzat e “Shpërdorimit të detyrës” dhe “Korrupsionit pasiv i personave që ushtrojnë funksione publike”. Arrestimi i tij vjen pas hetimeve disa mujore të drejtuara nga Prokuroria pranë Gjykatës së Shkallës së Parë të Juridiksionit të Përgjithshëm Tiranë, ku u siguruan prova për implikimin e tij në veprimtari kriminale në pikat kufitare të Aeroportit Rinas.
Detajet e hetimit
Në vijim të komunikatës së datës 04.06.2024, Agjencia e Mbikëqyrjes Policore konfirmoi arrestimin e Inspektorit Briken Tereziu, i cili ishte pjesë e një grupi që lejonte kalimin e shtetasve me probleme në vendet Schengen në këmbim të shumave monetare. Tereziu kishte kontakte të vazhdueshme me Enea S., pronari i agjencisë turistike “Bus Albania”, dhe ndihmonte në kalimin e personave që nuk lejoheshin të udhëtonin drejt vendeve të BE-së. Hetimet zbuluan se ky aktivitet kriminal zhvillohej nga marsi 2023 deri në mars 2024, dhe përfshinte edhe kolegë të tij të cilët merrnin shuma të ndryshme parash për të lejuar këto kalime. Gjykata e Tiranës vendosi masën e sigurimit personal “Arrest në burg” për Tereziun, pas ekzekutimit të urdhrit nga Agjencia e Mbikëqyrjes Policore.
