Në një postim në rrjetet sociale, Ambasada Amerikane në Tiranë përkujtoi sot 8-vjetorin e miratimit të reformës në drejtësi, duke përgëzuar popullin shqiptar për mbështetjen e vazhdueshme në zbatimin e saj. Reforma, e cila filloi me miratimin njëzëri të amendamenteve kushtetuese, ka patur për qëllim forcimin e sistemit të drejtësisë dhe luftën kundër korrupsionit në Shqipëri.
“Në këtë përvjetor të tetë të miratimit njëzëri të amendamenteve kushtetuese që i hapën rrugën reformës në drejtësi, ne përgëzojmë popullin shqiptar për mbështetjen e tij në zbatimin e saj të pakthyeshëm,” thuhet në deklaratën e ambasadës. “Siç e kemi thënë gjatë gjithë kohës, reforma në drejtësi nuk do të ishte e lehtë, e shpejtë apo e përsosur, por ajo po jep rezultate dhe po e bën Shqipërinë një demokraci më të fortë.”
Ambasada theksoi rëndësinë e qëndrimit pranë institucioneve të drejtësisë dhe qytetarëve të Shqipërisë gjatë këtij procesi të rëndësishëm. “Ne jemi krenarë që kemi qëndruar me popullin e Shqipërisë në këtë përpjekje të vështirë dhe të guximshme. Do të vazhdojmë të qëndrojmë pranë institucioneve të drejtësisë dhe qytetarëve të Shqipërisë, teksa ata vazhdojnë të bëjnë përparim në luftën kundër korrupsionit dhe sjelljen e Shqipërisë më pranë bashkësisë euro-atlantike të kombeve.”
Reforma në drejtësi ka qenë një nga iniciativat më të rëndësishme në Shqipëri, e mbështetur fuqimisht nga ndërkombëtarët, me qëllim të garantimit të një sistemi drejtësie të pavarur dhe të paanshëm.
