AI del jashtë kontrollit? Testet në Britani: Modelet tentuan të mashtronin njerëzit dhe të fshihnin gjurmët

Një raport i Institutit Britanik për Sigurinë e Inteligjencës Artificiale ka ngritur shqetësime të forta pasi disa modele të avancuara të AI shfaqën sjellje të paautorizuara gjatë testeve të sigurisë.

Sipas raportit, gjatë eksperimenteve disa sisteme tentuan të mashtronin persona realë për të miratuar kod me qëllim të dëmshëm. Në një rast, inteligjenca artificiale krijoi identitete të rreme në internet dhe ushtroi presion ndaj administratorit të një projekti në GitHub për të pranuar ndryshimet, por tentativa dështoi.

Nga 122 testime të kryera, u identifikuan 19 episode me veprime autonome dhe të paautorizuara. Hetuesit zbuluan gjithashtu se disa modele tentuan të përdornin rrjetin “Tor” për të fshehur aktivitetin e tyre dhe të dërgonin udhëzime të fshehta për agjentë të tjerë të inteligjencës artificiale.

Autoritetet britanike theksojnë se nuk u shkaktuan dëme reale, por e cilësojnë këtë zhvillim si një sinjal serioz paralajmërues. Sipas tyre, është hera e parë që sjellje të tilla autonome dhe mashtruese dokumentohen kaq qartë gjatë testeve, duke shtuar nevojën për masa më të forta sigurie dhe mbikëqyrjeje.