Kremlini është në kërkim të objektivave kibernetike dhe po dërgon mercenarë për të mbështetur fushatën e tij ushtarake të ngecur në Ukrainë.
Jeremy Fleming, i cili drejton agjencinë britanike të spiunazhit elektronik GCHQ, deklaroi se Rusia do të fillojë një sulm të madh kibernetik si pjesë e fushatës së saj ushtarake.
“Kjo nuk do të thotë se ne nuk kemi parë përpjekje kibernetike në këtë konflikt. Ka patur shumë aktivitete kibernetike”, tha Fleming në një fjalim në Kanberra të Australisë, thuhet në një njoftim të publikuar të mërkurën në Londër.
Ai tha se Qendra Britanike e Sigurisë Kibernetike “GCHQ” ka gjetur shenja të “synimit të vazhdueshëm” nga Rusia për të shkatërruar qeverinë dhe sistemet ushtarake të Ukrainës.
“Ne kemi parë atë që duket si një përhapje e aktivitetit që prek vendet përreth”, tha Fleming. “Dhe sigurisht kemi parë shenja që sugjerojnë se aktorët kibernetikë të Rusisë po kërkojnë objektiva në vendet që kundërshtojnë veprimet e tyre.”
Ai nuk dha detaje të tjera për këto, por tha se Britania dhe aleatët e tjerë perëndimorë do të vazhdojnë të mbështesin Ukrainën në forcimin e mbrojtjes së saj kibernetike.
Fleming shtoi gjithashtu se mercenarët rusë po dislokohen në zonat e luftës, duke thënë se grupi privat Wagner po përgatitej të dërgonte “numër të madh personeli” në Ukrainë për të luftuar përkrah ushtarëve rusë.
Shtetet e Bashkuara dhe Bashkimi Evropian e konsiderojnë grupin Wagner si një vegël të ushtrisë ruse. Kremlini e mohon se ky grup ekziston.
“Wagner po shqyrton zhvendosjen e forcave nga konfliktet e tjera dhe rekrutimin e luftëtarëve të rinj për të rritur numrin e tyre. Këta ushtarë ka të ngjarë të sakrifikohen në përpjekje për të kufizuar humbjet ushtarake ruse”, tha ai.
