Apeli i Gjykatës së Posaçme Kundër Korrupsionit dhe Krimit të Organizuar ka shpallur vendimin për Arbër Çekajn, për të cilin ka vendosur dënimin me 14 vite burg.
Veç Çekajt, gjykata ka dhënë dënimin me 10.8 vite burg për Donaldo Lushajn dhe 8.8 vite për Armando Pezakun. Të tre të akuzuarit iu nënshtruan gjykimit të shkurtuar.
Menjëherë pas marrjes së vendimit ka reaguar edhe avokati mbrojtës i Arbër Çekaj i cili tha se “kjo gjykatë është kthyer në një notere të prokurorisë dhe kjo është për të ardhur keq. Çekaj dërgoi ditën e sotme të gjithë mbrojtjen me shkrim, por gjykata nuk e pranoi”.
Kujtojmë se Arbër Çekaj , Donaldo Lushaj e Armando Pezaku, u arrestuan në shkurtin e vitit 2018 pasi u kapën me 613 kg kokainë në kontejnerin e bananeve të kompanisë së Çekajt, Arbër Garden që vinte nga Amerika Latine.
Arbër Cekaj nuk pranon trafikimin e kokainës duke akuzuar policisë se ka dekonspiruar operacionin.
Dënimi
Prokuroria kishte kërkuar 21 vite burg për Çekajn, kërkesë e cila u pranua edhe nga Gjykata, por për shkak të gjykimit të shkurtuar Çekaj përfitoi ulje të dënimit me një të tretën, duke u dënuar përfundimisht me 14 vjet burg.
Çekaj i mohoi vazhdimisht akuzat, duke mos e pranuar përfshirjen e tij në trafik.
Ndërkohë Donald Lushaj, administratori i “Arbri Garden” u dënua me 16 vite, teksa i shkurtohet në 10 vite e 8 muaj.
Për shoferin e kamionit që çoi kontejnerin në magazinën e tij, Armando Pezaku, u dha dënimi me 13 vite burgim, dhe i ulet në 8 vite e 8 muaj.
